ალესანდრა სამხარაძე , მხოლოდ 9 წლისაა, თუმცა უკვე მოახერხა ის,რაზეც ბევრს წლები სჭირდება-მან ხელოვნებაში საკუთარი ადგილი დაიმკვიდრა. მისი პირველი ფუნჯის მოსმის შემდეგ, აშკარა იყო, რომ ეს პატარა გოგონას ფერებს მხოლოდ თვალით კი არა, გულითაც გრძნობს.
ალესანდრა დაიბადა იტალიაში, თუმცა უკვე წლებია ზესტაფონში ცხოვრობს და აქაურობას თავის ნამდვილ სახლად მიიჩნევს. სწავლობს წარჩინებით, თავისუფალ დროს კი ხატვას უთმობს-სტუდია ,,სიყვარულის ფერებში”, სადაც ის სწავლობს, ამბობენ, რომ ალესანდრა ერთ-ერთი ამომავალი ვარსკვლავია.
მისი ნამუშევრები უკვე არაერთ გამოფენაშია წარმოდგენილი, თუმცა ახლანდელი წარმატება განსაკუთრებით აღსანიშნავია: ალესანდრამ შექმნა ნახატი, რომელიც ეძღვნება მისთვის ძვირფას და მნიშვნელოვან მუსიკალურ ფესტივალს-ევროვიზიას. ნამუშევარში გააერთიანა მუსიკისადმი სიყვარული, მხატვრობის უნარი და პატრიოტული სულისკვეთება,რის შემდეგაც ფერწერით სავსე ტილო, შვეიცარიისკენ გაემართა და ევროვიზიის სცენამდე მიაღწია.
შეგახსენებთ, რომ ქართულ-იტალიური ტელეკომპანია KN TV, უკვე მეორედ, ევროვიზიის საერთაშორისო კონკურსზე, საქართველოს მხარსდასაჭერად იმყოფება. ჟურნალისტმა ქეთი ნოგიევამ, შვეიცარიაში, ქ.ბაზელში, საქართველოს წარმომადგენელს,მარიამ შენდგელიას, სწორედ ალესანდრას ნახატი გადასცა და მომღერლისგან პატარა მხატვარმა დიდი კომპლიმენტიც დაიმსახურა.
”ალესანდრას ფუნჯი ქართულად ლაპარაკობს”-ამბობს ალესანდრას დედა და დასძენს, რომ ხატვისადმი სიყვარული მისმა მასწავლებელმა, მელანო სარალიძემ ასწავლა. დედის თქმით, ალესანდრას გულით უყვარს საქართველო და განსაკუთრებით-მშობლიური ქართული ენა. მისი ფუნჯიც თითქოს ქართულად საუბრობს-სათუთად,ღრმად და ემოციურად.
ევროვიზიის დიდი ქომაგია ეს პატარა ხელოვანი. თავისი გულწრფელი სიყვარული მუსიკისადმი და მხატვრობის უნარიც გააერთიანა ერთ ნახატში და დასახული მიზანიც განახორციელა. მის ნამუშევარში არამხოლოდ ფერები,არამედ გულწრფელი ემოციაც დევს-ბავშვის სიყვარული ხელოვნების,სამშობლოსა და მომავლის მიმართ.
KN TV წარმატებას უსურვებს ალესანდრას-პატარა მხატვარს დიდი ოცნებით.
ჟურნალისტი: ქეთი ნოგიევა